Yaponiya Cənubi Qafqazdan keçən nəqliyyat marşrutlarına maraq göstərir - Nikkei

Cənubi Qafqazdan keçən nəqliyyat marşrutları təkcə region ölkələrinə deyil, həm də Yaponiyaya fayda verə bilər.

FinFly-nin məlumatına görə, bu barədə Nikkei nəşrində "Avrasiyada perspektivli nəqliyyat dəhlizlərinə" həsr olunmuş analitik məqalədə deyilir.

Orada qeyd olunur ki, regiondakı əsas marşrutlardan biri Orta Dəhliz və ya Transxəzər Beynəlxalq Nəqliyyat Marşrutudur (TITR).

Məqalədə qeyd olunur ki, "Yaponiya Orta Dəhlizə böyük ümidlər bəsləyir. 2025-ci ilin dekabr ayında Yaponiyanın Baş naziri Sanae Takaiçi beş Orta Asiya ölkəsinin lideri ilə görüşmüş və Tokionun bu marşrutun inkişafına dəstəyini ifadə etmişdir".

Bundan əlavə, bildirilir ki, Cənubi Qafqaz regionu Avropa ilə Asiyanı birləşdirən "müasir İpək Yolu" adlandırıla bilən mühüm nəqliyyat mərkəzi kimi diqqəti cəlb edir.

Orta Dəhlizdən əlavə, Yaponiya nəşri TRIPP layihəsinin - "Beynəlxalq Sülh və Rifah üçün Tramp Marşrutu"nun potensialını da önəmli bilir.

Məqalədə deyilir ki, "Bu marşrutun inkişafı Azərbaycan və qardaş ölkə Türkiyə ilə əhatə olunmuş və uzun müddətdir ciddi ticarət məhdudiyyətləri ilə üzləşən Ermənistana da əhəmiyyətli fayda gətirəcək".

---