Qazaxıstan və Türkiyə beynəlxalq avtomobil daşımaları barədə yeni razılığa gəliblər

Qazaxıstan və Türkiyə beynəlxalq avtomobil daşımalarının şərtlərini sadələşdirmək barədə yeni razılığa gəliblər.

FinFly-nin Qazaxıstan nəqliyyat nazirliyinə istinadən verdiyi məlumata görə, tərəflər Türküstanda bir sıra mühüm razılaşmalar əldə ediblər.

"Qazaxıstan və Türkiyə tranzit icazəsi sisteminin ləğvi və sərbəst tranzitə keçidlə bağlı razılığa gəliblər. Beynəlxalq müqaviləyə dəyişikliklər edilənə qədər tranzit icazələri məhdudiyyətsiz veriləcək", - nazirlik bildirib.

Bundan başqa, iki ölkə arasında daşıyıcılara öz dəniz limanlarında yüklərin yüklənib və boşaldılması icazəsi veriləcək. Əvvəllər bu imtiyaz yalnız türk şirkətlərinə verilirdi.

Tərəflər həmçinin bu ilin sonuna kimi icazələrin mübadiləsini rəqəmsallaşdırmaq barədə də razılığa gəliblər.

İmzalanmış protokol Çin və Avropa arasında tranzit potensialının artması üçün yeni imkanlar açır.

---