Fintex subyektlərinin Ani Pay sisteminə inteqrasiyası müzakirə edilib - Mərkəzi Bank

Azərbaycan Mərkəzi Bankında (AMB) fintex subyektlərinin Ani Ödənişlər Sisteminə inteqrasiyası müzakirə edilib.

FinFly AMB-yə istinadən xəbər verir ki, qurumun sədr müavini Vüsal Xəlilov "Azərbaycan Fintex Assosiasiyası" İctimai Birliyinin nümayəndələri ilə görüş keçirib. Görüşdə bu ilin I yarısında fintex ekosistemində müşahidə olunan əsas trendlər və inkişaf prioritetləri ətraflı müzakirə olunub.

Ani Ödənişlər Sisteminin əhatə dairəsinin genişləndirilməsi və fintex subyektlərinin bu sistem vasitəsilə innovativ həllərə çıxış imkanlarının artırılması, eləcə də elektron pul və ödəniş təşkilatlarının fəaliyyətlərinin ƏL/TMM və informasiya təhlükəsizliyi üzrə qanunvericilik tələblərinə tam uyğunluğunun təmin edilməsi və komplayens risklərinin effektiv idarə olunması məsələləri görüş iştirakçılarının diqqətinə çatdırılıb.

Görüşdə həmçinin xüsusi tənzimləmə rejiminin təkmilləşdirilməsi və tətbiq imkanları, açıq bankçılıq sahəsində aparılan işlər, virtual aktivlər, onların təminatçılarının fəaliyyətini tənzimləyən qanun layihəsinin hazırlanmasına dair fikir mübadiləsi aparılıb.

---