Bakının Beynəlxalq Aeroportu 8 milyona yaxın sərnişinə xidmət göstərib

2025-ci ildə Bakının Heydər Əliyev Beynəlxalq Aeroportunda 7 milyon 640 mindən çox sərnişinə xidmət göstərilib.

Bu barədə FinFly hava limanından məlumat əldə edib.

Qeyd olunub ki, bu göstərici ötən ilin eyni dövrü ilə müqayisədə 1 faz artım deməkdir.

Məlumata əsasən, beynəlxalq istiqamətlər üzrə daşınan sərnişinlərin sayı 6 milyon 895 min (1 faiz böyümə) olub. Bu həcmin 51,2 faizi xarici aviaşirkətlərin, 3 milyon 362 min sərnişin isə milli aviadaşıyıcının payına düşüb.

İl ərzində hava limanından 40 xarici aviaşirkət tərəfindən 75 beynəlxalq istiqamət üzrə reyslər yerinə yetirilib. Ən çox seçilən istiqamətlər İstanbul, Tbilisi, Dubay, Ankara və Moskva olub.

Eyni zamanda Heydər Əliyev Beynəlxalq Aeroportu üzərindən tranzit daşınan sərnişinlərin sayı 974 mindən çox olub. Bu da 2024-cü ildə qeydə alınan 750 min göstərici ilə müqayisədə təxminən 30 faiz artım deməkdir.

Beləliklə, 2025-ci ilin nəticələri Azərbaycanın aviasiya sektorunun beynəlxalq inteqrasiya, təhlükəsizlik və strateji liderlik istiqamətində ardıcıl və sistemli şəkildə inkişaf etdiyini bir daha təsdiqləyir.

---