Bakı taxıl terminalı Qazaxıstandan ilk buğda partiyasını qəbul etdi

Bakı Taxıl Terminalı Qazaxıstandan ilk buğda partiyasını qəbul etdi.

FinFly xəbər verir ki, bu hadisə Qazaxıstan və Azərbaycan arasında ikitərəfli ticarət əlaqələrinin inkişafında mühüm mərhələ olub.

Bu münasibətlə “Ak Bıday Terminal” ASC-nin İdarə Heyətinin sədri Nurlan Erkojaulu işgüzar səfərlə Bakıya gəlib.

Səfər proqramına kənd təsərrüfatı logistikası və ticarət sahəsində əməkdaşlığın möhkəmləndirilməsinə yönəlmiş bir sıra əsas görüşlər daxil olub. Bakı limanının rəhbərliyi ilə keçirilən işgüzar görüşdə terminalın əməliyyat prosesləri, taxılın qəbulu və saxlanması ilə bağlı texniki məsələlər, eləcə də tədarüklərin genişləndirilməsi imkanları müzakirə edilib.

Səfər çərçivəsində diplomatik əlaqələrə də xüsusi diqqət yetirilib. Nurlan Erkojaulu Qazaxıstanın Azərbaycandakı fövqəladə və səlahiyyətli səfiri Alim Bayel ilə görüşüb. Görüşdə əsas müzakirə mövzusu ticarət-iqtisadi əlaqələrin inkişafına dair ikitərəfli “yol xəritəsi” çərçivəsində ixrac həcminin artırılması olub.

Tərəflər eyni zamanda mövcud logistik çağırışları müzakirə edib, tədarük zəncirlərinin dayanıqlığının və səmərəliliyinin artırılması ilə bağlı təklifləri bölüşüblər. İnfrastrukturun modernləşdirilməsi və taxıl daşımalarının həcminin artırılması təşəbbüsləri də nəzərdən keçirilib.

“Ak Bıday Terminal” ASC İdarə Heyətinin sədrinin işgüzar səfəri Qazaxıstan və Azərbaycanın aqrar əməkdaşlığı gücləndirməkdə qarşılıqlı maraqlı olduğunu bir daha nümayiş etdirdi. Qazaxıstan buğdasının Azərbaycana tədarükü, Qafqaz-Xəzər regionunda və ondan kənarda ixrac istiqamətlərinin genişləndirilməsi və iqtisadi əlaqələrin möhkəmləndirilməsi baxımından strateji addım hesab olunur.

---